Mae dealltwriaeth gynhwysfawr o fioamrywiaeth a sut mae organebau'n datblygu, yn esblygu ac yn rhyngweithio â'i gilydd a'r amgylchedd yn hanfodol i ddeall y prosesau sy'n sail i drefniadaeth fiolegol ar draws amser a gofod mewn byd sy'n mynd trwy newidiadau mawr yn amgylcheddol ac yn ecolegol.
Er mwyn mynd i’r afael ag amrywiaeth o themâu ymchwil pur a chymhwysol ar raddfeydd micro a macro, rydym yn unedig wrth ddefnyddio dulliau moleciwlaidd o’r radd flaenaf i astudio ystod eang o feysydd, o’r unigolyn i’r gymuned ac ar draws nifer o fïomau. Mae’r ffocws yn cynnwys y meysydd canlynol - addasiad cyflym, asesiad ecolegol bioamrywiaeth trwybwn uchel, cronobioleg, microbioleg amgylcheddol, microbiomau a firoleg, strategaethau hanes bywyd, bioleg esblygiadol a datblygiadol, adluniad esblygol, deinamig troffig a’r dynamig rhwng organebau lletyol a pharasitiaid, ffurfiant rhywogaethau a geneteg poblogaeth. Rydym yn defnyddio amrywiaeth o dechnegau blaengar megis genomeg gymharol, metagenomeg, trawsgrifomeg, metatrawsgrifomeg, proteomeg a metabolomeg, dadansoddi DNA cyfoes a DNA hynafol (e/aDNA) a thrin modelau genetig planhigion ac anifeiliaid, gan gynnwys bridio â chymorth marcwyr i fynd i’r afael â diogelu'r cyflenwad bwyd yn fyd-eang.
Mae ymchwilwyr yn rhannu mynediad i labordai ac ystafelloedd ymchwil a adnewyddwyd yn ddiweddar, gan gynnwys ystafelloedd glân DNA hynafol/eDNA, dyfeisiau trin hylif, ystafelloedd microsgopeg cydffocal, ystafelloedd y rheolir eu tymheredd, tai gwydr a Fferm Henfaes, acwaria morol a dŵr croyw, tai mamaliaid bach, ac ystafelloedd ymlusgiaid gwenwynig a rhai nad ydynt yn wenwynig. Mae mynediad a gefnogir i rwydwaith cyfrifiadurol dosbarthedig trwybwn uchel Uwchgyfrifiadura Cymru yn hwyluso'r broses angenrheidiol o ddadansoddi data ar gyfer synthesis biolegol diweddarach. Gan ddefnyddio dulliau o'r fath, rydym yn canolbwyntio ar y cyd ar fynd i'r afael â chwestiynau canlyniadol mewn gwyddoniaeth fyd-eang o'r lefel foleciwlaidd i'r lefel gymunedol.